Surxondaryo viloyati, Angor tumanidagi 41-maktabning 11-sinf o‘quvchisi Sarvarxoji Abduqodirov ajoyib natija qayd etdi. U 5 ta fandan milliy sertifikatlarni qo‘lga kiritib, oliygohga kirish uchun maksimal 189 ballni muddatidan oldin naqd qildi.
Bo'lg'usi talaba kimyo va biologiyadan eng yuqori A, tarixdan B, shuningdek, matematika hamda o‘zbek tili va adabiyotidan C+ darajali sertifikatlarga ega bo'ldi. Uning asosiy maqsadi Toshkent davlat tibbiyot universitetiga o‘qishga kirib, yetuk shifokor bo'lishdir.
Tayyorgarlik jarayoni qanday kechdi?
Sarvarxojining aytishicha, bu natijaga erishish oson bo'lmagan va qattiq tartib-intizom talab qilingan. U har bir fanga alohida vaqt ajratib tayyorgarlik ko'rgan:
- Kimyo — 3 yil
- Biologiya — 1,5 yil
- Matematika — 4 oy
- Tarix — 3 oy
- Ona tili va adabiyot — 1 oy
O'quvchining so'zlariga ko'ra, eng samarali usullardan biri bu — 40 daqiqa davomida telefonsiz, diqqat bilan dars qilib, so'ngra 5 daqiqa dam olishdir. Garchi tayyorgarlik davomida ba'zi fanlardan past ballar olib, turli tanqidlarga uchragan bo'lsa-da, u ustozlarining qo'llab-quvvatlashi va kuchli irodasi evaziga harakatdan to'xtamagan.
Tengdoshlarga tavsiyalar
Muddatidan avval talaba bo'lish baxtiga erishgan Sarvarxoji o'z tengdoshlariga quyidagilarni maslahat beradi:
- Maqsad sari tinimsiz harakat qilish;
- Telefondan kamroq foydalanib, chalg'imaslik;
- Xatolarni tahlil qilib, to'g'ri xulosa chiqarish;
- Test jarayonida hayajonni yengib, o'ziga ishonish.
Hozirgi kunda qahramonimiz ingliz tilini chuqur o'rganishni boshlagan va sertifikatlari sonini yana bittaga ko'paytirish niyatida.
Xulosa o'rnida: Mehnat va qat’iyat, to‘g‘ri metodika, tartib va intizom har qanday qiyinchilikni yengib o'tishga va kutilgan muvaffaqiyatga erishishga yordam beradi. Sarvarxojiga kelgusi o'qishlarida omad tilab qolamiz!
Izohlar (0)
Izoh yozish uchun tizimga kiring.