Oʻzbekiston oliy taʻlim tizimida yana bir muhim voqea — Toshkentda Yaponiyaning nufuzli Sukuba universiteti bilan hamkorlikda qoʻshma universitet tashkil etilmoqda. Onlayn kelishuvga Oliy taʻlim, fan va innovatsiyalar vaziri Qoʻngʻirotboy Sharipov hamda Sukuba universiteti prezidenti Kyosuke Nagata imzo chekdi.
Yangi universitet Oʻzbekiston qonunchiligiga muvofiq mustaqil yuridik shaxs sifatida faoliyat yuritadi. Taʻsischilar — Oʻzbekiston Oliy taʻlim, fan va innovatsiyalar vazirligi hamda Sukuba universiteti muvofiqlashtiradigan Yaponiya universitetlari konsorsiumi.
Bu haqda avvalroq Toshkentda tashkil etilgan Yaponiya raqamli universiteti haqida ham yozgan edik.
Dastlab qanday yoʻnalishlar ochiladi
Universitetda dastlab magistratura dasturlari yoʻlga qoʻyiladi. Birinchi bosqichda ikkita yoʻnalish boʻyicha mutaxassislar tayyorlanadi:
- Sunʻyiy intellekt va raqamli transformatsiya
- Biznes boshqaruvi
Keyingi bosqichlarda doktorantura va bakalavriat dasturlarini ochish rejalashtirilgan. Taʻlim jarayoni ingliz tilida olib borilib, Yaponiya oliy taʻlimi modeli asosida tashkil etiladi. Talabalar uchun Yaponiyada qisqa muddatli taʻlim dasturlari va yapon tili hamda madaniyatiga oid kurslar ham tashkil etilishi koʻzda tutilgan.
Moliyalashtirish va boshqaruv qanday yoʻlga qoʻyiladi
Kelishuvga koʻra, Oʻzbekiston tomoni universitet kampusi, zamonaviy oʻquv va ilmiy infratuzilma, professor-oʻqituvchilar hamda maʻmuriy xodimlar faoliyatini moliyalashtirishni oʻz zimmasiga oladi. Sukuba universiteti esa oʻquv dasturlarini ishlab chiqish, Yaponiya universitetlari konsorsiumi faoliyatini muvofiqlashtirish, professor-oʻqituvchilarni jalb etish va akademik almashinuv dasturlarini tashkil etishda koʻmaklashadi.
Bunday hamkorlik modeli talabalarga Yaponiya taʻlim standartlari boʻyicha bilim olish va xalqaro darajada raqobatbardosh mutaxassis boʻlib yetishish imkonini beradi.
Qachon ish boshlaydi
Rejaga koʻra, 2026-yil sentyabr oyidan Toshkent shahrida tayyorgarlik ofisi ish boshlaydi. Magistratura dasturlariga ilk qabul esa 2028/2029-oʻquv yilidan amalga oshirilishi rejalashtirilgan.
Mazkur loyiha Oʻzbekiston va Yaponiya oʻrtasidagi oliy taʻlim sohasidagi strategik hamkorlikni yangi bosqichga olib chiqish hamda xalqaro standartlarga mos kadrlar tayyorlash tizimini rivojlantirishga xizmat qiladi. Bu haqda Oliy taʻlim, fan va innovatsiyalar vazirligi matbuot xizmati xabar berdi.
InfoEdu.uz — Oʻzbekiston oliy taʻlimidagi xalqaro hamkorlik va yangi loyihalarni yorituvchi ishonchli manba.
Reklama
Izohlar (0)
Izoh yozish uchun tizimga kiring.