Maktabgacha va maktab ta'limi tizimidagi pedagog kadrlar uchun o'tkaziladigan kuzgi attestatsiyaga arizalar qabuli o'z nihoyasiga yetmoqda. Hujjat topshirish jarayoni 30-sentabr soat 23:59 ga qadar davom etadi hamda 1-oktabrdan e'tiboran tizim arizalarni qabul qilishni to'xtatadi.
Kuzgi attestatsiya bosqichi va ariza topshirish tartibi
Maktabgacha va maktab ta'limi vazirligi tomonidan belgilangan tartibga ko'ra, arizalar pedagog.uzedu.uz interfeysi hamda my.gov.uz portali orqali onlayn shaklda qabul qilinadi.
Belgilangan nizomga asosan, har yili kuzgi attestatsiya uchun hujjatlar qabuli 1-oktabrda rasman to'xtatiladi. O'qituvchilar so'nggi kunlarda shoshma-shosharlik bilan ariza yuborib, xatolikka yo'l qo'ysalar va me'yoriy muddat o'tsa, rad etilgan arizalarni qayta tahrirlash imkoniyati bo'lmaydi.
Hujjatlardagi xatoliklar va to'lov shartlari
Shuningdek, hujjatlardagi kamchilik va xatoliklar sababli rad etilgan arizalar uchun amalga oshirilgan to'lovlar pedagoglarga qaytarib berilmaydi. Shu sababli shaxsiy ma'lumotlar hamda malaka hujjatlarini kiritishda alohida diqqat-e'tibor talab etiladi.
Attestatsiyada qatnashish uchun yig'im stavkalari
Pedagog kadrlarni navbatdagi majburiy attestatsiyadan o'tkazish bo'yicha davlat xizmatini ko'rsatganlik uchun yig'im undirilmaydi, ya'ni bu jarayon mutlaqo bepul amalga oshiriladi.
Navbatdan tashqari attestatsiyada o'z xohishi bilan ishtirok etishni istagan pedagoglar esa bazaviy hisoblash miqdorining (BHM) 50 foizi miqdorida to'lov amalga oshirishlari belgilangan.
Izohlar (0)
Izoh yozish uchun tizimga kiring.
Hozircha izohlar yo‘q.
Birinchi bo‘lib izoh qoldiring