Ikki o‘zbekistonlik olim nomi asteroidlarga berildi

O‘zbekiston Fanlar akademiyasi Astronomiya institutining ikki nafar olimi — Kamoliddin Ergashev va Otabek Burxonov nomi xalqaro astronomik kataloglarga kiritildi. Xalqaro astronomiya jamiyati (IAU) ularning nomini ikki asteroidga berish to‘g‘risida qaror qabul qildi.

O‘zbekiston Fanlar akademiyasi ma'lum qilishicha, mazkur qaror Xalqaro astronomiya jamiyatining Kichik jismlar bo‘yicha qo‘mitasi (WGSBN) tomonidan 2026-yil 9-iyul kuni e'lon qilingan.

Qaysi asteroidlarga olimlar nomi berildi?

Yangi nomlar WGSBN byulletenining 6-jild, 11-sonida rasman e'lon qilingan.

Shunga ko‘ra:

Mazkur nomlar bundan buyon xalqaro astronomik kataloglar, ilmiy maqolalar va boshqa rasmiy manbalarda qo‘llaniladi.

Kamoliddin Ergashev haqida

Dastlab 2001 KA2 belgisi bilan ro‘yxatga olingan asteroid 2001-yil 19-may kuni Chexiyadagi Ondřejov observatoriyasida kashf etilgan.

Unga Astronomiya instituti katta ilmiy xodimi Kamoliddin Ergashev sharafiga "Kamolergashev" nomi berildi.

Rasmiy ma'lumotlarga ko‘ra, Kamoliddin Ergashev 2007-yildan buyon asteroidlarni tadqiq etib kelmoqda. Uning ilmiy ishlari asteroidlarning fizik xususiyatlari, fotometriyasi hamda qo‘shaloq asteroid tizimlarini o‘rganishga bag‘ishlangan.

Otabek Burxonov haqida

Yana bir asteroid dastlab 1999 TO15 belgisi bilan ro‘yxatga olingan bo‘lib, unga Astronomiya instituti laboratoriya mudiri Otabek Burxonov sharafiga "Otabekburkhonov" nomi berildi.

Ma'lum qilinishicha, Otabek Burxonov 2000-yildan buyon Astronomiya institutida faoliyat yuritadi. Uning ilmiy tadqiqotlari asteroidlar fotometriyasi, o‘zgaruvchan yulduzlar, gravitatsion linzalangan kvazarlar hamda gamma-chaqnashlarning optik kuzatuvlariga bag‘ishlangan.

Olimlar NASA mukofoti bilan ham taqdirlangan

InfoEdu.uz o‘rganishicha, Kamoliddin Ergashev va Otabek Burxonov NASAning sayyoraviy mudofaa tajribasi doirasidagi ishlarga qo‘shgan hissasi uchun NASA Group Achievement Award mukofoti bilan ham taqdirlangan.